يا شعب يا معلم .. يا ساكت اتكلم






قول ع الهرم مواويل .. يا شعب يا قوّيل
خلى التاريخ يحكى .. ع الشاكى والمشكي

الله يا شعب الله .. يا شعب دينه حياه
يا ارض ما لها مثيل .. يا وهبه جابها النيل

يمين يا مصر يمين .. بالطين وغالى الطين
ما تعتبك أقدام .. الاَّ بخير وسـلام

وإن عتبك طاغى .. دورى على الباغي
وإن عتبك مغرور .. العقبى ع اللى يجور

وأن عتبك طمعان .. ما يلاقى فيكى أمان
وإن عتبك ملعون .. لو حتى نابليون

والتين والزيتون .. والتين والزيتون
لا تولعى يا مصر .. ويكون ترابك جمر

ومصر هيه مصر .. والوعد هوه النصر
وتعالوا يا ولادنا .. واتوصوا ببلدنا

وزى نن العين .. صونوها بين جفنين
يا شعب يا معلم .. يا ساكت اتكلم