الموضوع: انتخبوني.....شعر محمود عبد الواهب

بسم الله الرحمن الرحيم

هذه القصيدة قرأتها من أكتر من 15 سنة
وفي كل انتخابات تمر علينا أتذكرها
هي لشاعر اسمه محمود عبد الواهب
من ديوان اسمه عزيزى المواطن
الرجا من من يعرف هذا الشاعر أو يعرف اى قصيدة له فليخبرني
فأنا أبحث عن أعماله ولا أجدها


يقول الشاعر :
انتخبوني

أنا مش حدّي لحد وعود ولا عاشق لعيونكو السود
ولا حاخد من "موسي " عصايته ولا حاعمل للفقر حدود
ولا حاتنيل علي عين أهلي ولا حاسمع لو حد ندهلي
ولا بينكم حاصبح موجود
فانتخبوني
وستجدوني .... أنضف جداً م الموجود
..................
يا جماهير الشعب الواعي يا أوجاع بتزيد أوجاعي
يا عشمي وغشمي وأطماعي يا خوفي وبابي المردود
يا طلسم ... محتاج تفسير ومعايا متفرقش كتير
وزمانكم كده كده مفقود
فانتخبوني
وستجدوني ... أشجع جداً م الموجود
..................
سبقونا الهلافيت ع العزبة من بعد ما لهفوا الأصوات
وسابونا ... بنهر محبة واتلبخوا ف صرف البدلات
انصرفوا للهدف الأسمي للجمع المشبوه والقسمة
واترسمت ف وشوشهم بسمة وحمارهم بقي زلمكات
عمدتهم كا أصله غفير اتبرمج وعاملي "مشير "
وبيفهم قال في الدساتير ؟؟! ويناقش في مواد وبنود !!
فانتخبوني وستجدوني ....
أنا مش ألطخ م الموجود
...............
انتخبوني الله يكرمكم انتخبوني ينوبكو ثواب
حافضل شايل فضل كرمكم وأهو كداب مطرح كداب
صوتكوا أمانة.. ضايعة معانا زي ماضعتوا مع النواب
الـ "مرضان" أبو بدلة وشنطة والتعباب أبو حزب أونطة
والحلوف أبو وش ودود
فانتخبوني وستجدوني
أنا مش أوسخ م الموجود
...................
أنا مش حدي لحد وعود ولا عاشق لعيونكو السود
ولا حارفع صوتكم ولا نيلة دي بلدكم رايحه ف تعسيلة
منكوبة وخيبتها تقيلة تفكيركم دايما محدود
إدوني لو بالبراطيش
إدوني وماترحمونيش
دي خيبتكم خيبة بكرانيش
\ومزاجكم ف المش أبو دود
فانتخبوني
وستجدوني
أحدق جدا م الموجود