صفحة 3 من 3 الأولىالأولى 123
النتائج 21 إلى 24 من 24

الموضوع: صح وغلط وقصة طريفة .. 30 حلقة إن شاء الله

  1. #21
    عضو مميز
    رقم العضوية : 25101
    تاريخ التسجيل : Nov 2009
    المشاركات: 222
    التقييم: 10
    الجنـس : Man

    افتراضي

    الحمد لله وحده والصلاة والسلام على من لا نبى بعده

    ومع الحلقة رقم 10

    من سلسلة

    " صح وغلط وقصة طريفة "

    1- صح :-

    صلاة الفجر

    ايه اخبارك مع صلاة الفجر ؟

    اه .. الحمد لله بصحى الصبح اخش اتوضأ واصلي الفجر وانزل الشغل

    ده بيبقى الساعه كم ؟؟

    على الساعه 8 كده ...!!

    يعنى بعد ما خرج وقتها

    ده فعلا حال كثيييير من المسلمين إلا من رحم ربي

    طيب فيه ناس كده برضه في رمضان ؟؟

    للأسف اه ... لا لا مش ممكن .. انت بتبالغ .. مين ده اللى يضيع الفجر في رمضان ؟؟ في كثير للأسف

    صلاة الفجر تشتكي كثرة الهاجرين .. صلاة الصبح تأن من قلة المصلين

    مينفعش ابدا يبقى مسلم في رمضان بيصلي تراويح - لنفترض يعنى - ومبيصليش الفجر .. تيجى ازاى ديه بالله عليكم ؟

    يصلي السنة ويسيب الفرض

    قال رسول الله صلى الله عليه وسلم :-

    " من صلى البردين دخل الجنة "
    البردين : الصبح والعصر

    وقال صلى الله عليه وسلم :-

    " لن يلج النار أحد صلى قبل طلوع الشمس و قبل غروبها"

    وقال صلى الله عليه وسلم :-

    " من صلى الصبح فهو في ذمة الله "
    في ذمة الله يعنى : في حماية الله

    وقال صلى الله عليه وسلم :

    " إن أثقل صلاة على المنافقين صلاة العشاء وصلاة الفجر، ولو يعلمون ما فيهما لأتوهما ولو حبوا "

    لازم نحافظ إن شاء الله على صلاة الفجر ونكلم صحابنا ونسالهم .. ايه اخبار صلاة الفجر معاكم .. ونكلمهم علشان يصحوا و ندعوهم لصلاة الفجر

    خصوصا في رمضان يعنى وعموما طول السنة

    __________________________________

    2 - غلط :-

    خلاص فات ثلث رمضان .. وبما ان فات ثلث رمضان .. ده معناه ان فات 10 أيام من شهر رمضان

    وده يقودنا إلى أننا لو فتحنا الراديو - طبعا اقصد إذاعة القرآن الكريم- قبل صلاة التراويح في يوم 10 رمضان

    حتلاقى واحد حييجي وبصوت تخييين اوى - معرفش ليه لازم يبقى صوته تخين - !!ا

    وهو كمان يتخن صوته -يعنى هى ناقصة - ويروح خاضك و قايل :

    ها قد ولت أيام الرحمة !!! وبدأت أيام المغفرة

    فقد قال رسول الله صلى الله عليه وسلم :

    " شهر رمضان أوله رحمة ، وأوسطه مغفرة ، وآخره عتق من النار"

    أو حتى فى بعض البرامج أو بعض أئمة المساجد
    بيقولوا الحديث ده

    حتى في المسجد الذي نصلي فيه .. جاء مفتى سابق لمصر وقال الحديث

    بس المشكلة ان الحديث ده : منكر .. ضعيف جدا

    يعنى مش بس سنده ضعيف .. لا ضعيف جدا .. وكمان متنه منكر
    انظر : سلسلة الأحاديث الضعيفة للألباني حديث رقم 1569 وضعيف الجامع 2135

    وبعدين ده كلام يتقال أصلا : ها قد ولت ايام الرحمة !!ا ايه خلاص مفيش رحمة تانى ؟!!

    وبدأت أيام المغفرة !! ايه مكانش فيه مغفرة قبل كده !!

    يعنى حتى من معناه باين انه غلط

    لا شهر رمضان كله رحمة وكله مغفرة وكله عتق من النار بفضل الله عزّ جلّ

    وطبعا لو سمعت حد بيقوله..

    برااااااااااحه

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    _______________________________________


    3- قصة طريفة :-

    ذكر ابن الجوزي - رحمه الله - في ذكره للمغفلين من الأئمة :-
    " وقرأ إمام في صلاته : (( وواعدنا موسى ثلاثين ليلة وأتممناها بعشر فتم ميقات ربه خمسين ليلة )) فجذبه رجل وقال : ما تحسن تقرأ ؟ ما تحسن تحسب ؟ ."

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    يعنى لا عارف تقرا ولا عارف تحسب .. الراجل مستحملش راح شادّه من قفاه

    كثير جدا بنبقى عايزين نقرا بسرعه أو عايزين نختم كذا مرة .. ده مطلوب جدا .. بس المشكلة

    ان ساعات نقرا بسرعه جدا لدرجة اننا منبقاش عارفين احنا بنقرا ايه اصلا .. وما أبرّئ نفسي

    من كثر معايزين نخلص .. نقرا من غير اى تركيز لدرجة ان لو خلصت قراءة ورجعت تكمل بعد كده .. بسبب السرعه ديه من غير تركيز

    ممكن تقعد شوية مش عارف اصلا انت وقفت فين قبل كده ..
    طيب هو انا قريت الأيات ديه قبل كده ولا لا !!

    مش فاكر الآيات ديه قراها انهارده قبل كده ولا لا

    تلاقي واحد تقوله وصلت لفين ؟؟ يقولك : الحمد لله في الجزء 17

    في سورة ايه بقى ؟؟

    يقولك مش فاكر انا في ال 17 ده المهم .. فاضل 13 جزء يا باشا واختم

    بيبقى هم كثير منا هو في الجزء الكام وعايز يخلّص وخلاص ..
    مش مهم هو واخد باله اصلا هو بيقرا ايه ولا لا .. ممكن ميبصش اصلا لاسم السورة اللى بيقرأها

    لو حطيتله اى حاجه تانية بين القرآن ممكن يقراها وهو مش واخد باله .. قطار ماشي

    المهم يجري ويخلص علشان صحابوا ميبسبقوهوش .. وغير كده انسى بقه الأحكام ديه

    يعنى لا غنّه ولا مد ولا علامات وقف ولا اى حاجه .. انا عايز اوصل لسورة النااااااااااس ياعم الحاج

    احكام مين

    انا ناوى الشهر ده اختم بتاع 10 مرات كده ..

    وهو اصلا مش فاكر اى حاجه من اى حاجه قراها من ال 10 مرات ومفيش اى آية علّقت معاه ولا فاكرها

    طيب ده كلام ؟؟!ا

    طبعا ده كلام غلط في غلط

    لازم نحاول نختم عدة مرات لكن بتركيز ..

    علشان نفهم اللى بنقراه ونقدر نتدبر

    ونعرف ثلاثين وعشرة كام

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    ___________________________________
    كده خلصت الحلقة العاشرة يارب متكونوش زهقتوا ومعلش
    طولت عليكم

    وبكره إن شاء الله نلتقى في الحلقة الحادية عشر إن شاء الله

    وجزاكم الله خيرا



    _______________________________



    ابسط ما تساهم به نشر الحلقات ولو بالايميل لأصدقائك

  2. #22
    عضو مميز
    رقم العضوية : 25101
    تاريخ التسجيل : Nov 2009
    المشاركات: 222
    التقييم: 10
    الجنـس : Man

    افتراضي

    ومع الحلقة رقم 11

    من سلسلة

    " صح وغلط وقصة طريفة "

    معلش حلقة انهارده يمكن طويله شوية صغيرة .. بس قلت افضفض بدل ميحصلي حاجه

    1- صح :-

    قيام الليل

    التراويح والتهجد

    ايه اخبارك مع قيام الليل ؟؟ ايه اخبارك مع التراويح ؟؟

    والله الحمد لله .. يعنى عندنا شيخ ربنا يباركله

    Zenon شيخ
    Turbo شيخ

    ظابط وقته بالفمتو ثانية .. العشاء وال 11 ركعة تراويح في ثلث ساعه

    الركعة بآية ولو الآية طويله بيقسّمها على اتنين

    الحمد لله مبنتعبش خاالص من طول الوقفة

    بس المشكلة اننا بنروّح بيتونا عضلاتنا شادّه من سرعة الحركات .. لما بنسلّم من الصلاة تلاقي كله بينهج !!!

    طيب ده ايه الكلام ده ؟؟ فيه فعلا ناس كده ؟؟

    نعم .. فيه عندنا مسجد بدون مبالغة بيكون خلص تراويح بالوتر قبل ما المسجد اللى بنصلي فيه يكون أقام لصلاة العشاء

    يا جماعه صلاة قيام الليل تسمى قيام .. بنقوم فيها يعنى .. يعنى المستحب نطوّل شوية في القيام

    احنا مش رايحين نعمل ايروبيكس ومروحين بيوتنا تانى

    قال رسول الله صلى الله عليه وسلم :-

    من قام بعشر آيات لم يكتب من الغافلين ، ومن قام بمائة آية كتب من القانتين ، ومن قام بألف آية كتب من المقنطرين "

    الحديث معناه أن من صلى فى قيام الليل بعشر آيات لم يكتب من الغافلين في هذه الليلة ، ومن قام بمائة آية كتب من القانتين أى من الطائعين الخاشعين ، ومن قام بألف آية كتب من المقنطرين أى من جاؤوا بقناطير من الحسنات

    فأقل شئ ألا نُكتب من الغافلين .. وفي رمضان ينبغي ألا نفوّت صلاة التراويح -قيام الليل- وفي غير رمضان ليس أقل من نصلى ركعتين بعشر آيات حتى لا نكتب من الغافلين

    فاحرص على المساجد اللى بتصلي بجزء في التراويح .. وجزءين أو ثلاثه في التهجد

    ده شهر اجتهاد في القيام .. ويمكن لما نصلى التراويح بجزء والتهجد بجزءين نبلغ ال ألف آية ونكتب من المقنطرين والقانتين .

    ____________________________________

    2 - غلط :-

    جزء غلط انهارده مش حديث .. اقرؤا وانتوا تعرفوا

    شهر رمضان هو شهر الصوم .. وشهر القيام

    للأسف هناك من المسلمين من يضيّع القيام في شهر رمضان

    مبيصليش اى قيام ليل في رمضان

    لا تراويح ولا تهدج

    تهدج اه .. واحد صاحبي من يومين بيقولى : هو الصلاة التهدج ديه بقى بتبقى امتى

    قلتله صلاة ايه ؟؟ قالى تهدج

    ماااااا علينا

    طيب هل فعلا فيه حد ممكن يكون رمضان عدّى كله عليه ومصلاش قيام ليل ولا مرة ؟؟

    للأسف اه

    واحد زميلي بيقولي .. بقالى 3 سنين مصليتش تراويح ولا مرة !!!

    والمشكلة انه مش مثلا تارك للصلاة أو مفرّط .. لا

    بيصلي كل الفروض -في رمضان وفي غيره - وفي وقتها إلا الفجر للأسف

    ومحافظ على الصلاة وده انا عارفه وبشوفه

    طيب يعنى لو واحد تارك للصلاة قال كده .. كنا نقول ممكن .. لكن واحد مُصلّي وبقاله 3 سنين مصلاش تراويح ولا مرة !!

    وللأسف السنة ديه برضه لحد دلوقتى .. ولا مرة .. رغم انى تقريبا بقوله كل مبشوفه

    ومش سايبها عِند .. بس كسل ..لأنه بيقولى أنا زعلان من نفسي جدا

    يعنى ممكن يبقى ناوى يصلي وعايز يروح يصلي بس يكسل

    مره من سنتين .. واحد صاحبي - غير اللى فاتوا - قالى

    بص انا بقه السنة ديه معاك في صلاة التواريح كلها .. كل يوم معاك

    قلتله صلاة مين ؟

    قالى التواريح - وده غير الأولاني بتاع التهدج- !!

    قلتله خلاص يا سيدي .. انت معايا في صلاة التواريح

    الكلام ده قبل رمضان بيوم او اتنين مش فاكر

    اول يوم اشوف وشه بعدها كان يوم 25 رمضان

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    قلتله يعنى لا شفت وشك لا ف تواريح ولا ف تفاريح

    بص احنا نقضي اللى باقى تواشيح !!

    للأسف ده واقع .. فيه كثير من المسلمين صلاة القيام في رمضان ضايعه منهم

    فما بالكم بغير رمضان .. الله المستعان

    قال رسول الله صلى الله عليه وسلم عن عبد الله بن عمر - الحديث ده صحيح محدش يفتكر انه غلط -

    " نعم الرجل عبد الله ، لو كان يصلي بالليل . قال سالم : فكان عبد الله لا ينام من الليل إلا قليلا ."

    فلنحرص على قيام الليل خصوصا في رمضان

    فكما قال رسول الله صلى الله عليه وسلم :
    أفضل الصلاة بعد الفريضة صلاة الليل

    فلا نضيع هذه الصلاة العظيمة .. وأهم صلاة الليل صلاة الوتر ولو ركعة واحدة بسورة الإخلاص

    لازم نحافظ إن شاء الله على قيام الليل .. ونشجع اللى نعرفهم على قيام الليل .. نحاول واحنا رايحين ناخد حد معانا من صحابنا اللى ممكن يكونوا مبيصلوهاش

    بس تفهمومهم الاول انه رايح يصلي التراويح .. مش التواريح

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    ________________________________________

    3- قصة طريفة :-

    بمناسبة قيام الليل

    قال ابن الجوزي -رحمه الله- :-

    " وتذاكر قوم قيام الليل وعندهم أعرابي ، فقالوا له : أتقوم بالليل ؟ قال : أي والله ، قالوا : فما تصنع ؟ قال : أبول وأرجع أنام " !!

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    بيقوم يدخل الحمام ويرجع ينام !! هي ديه فكرته عن قيام الليل !!

    المشكلة بقه الكبيرة .. ان بجد

    فيه ناس بيننا .. فاهمين قيام الليل غلط

    بس مش فاهمينه انه يقوم الحمام ويرجع ينام .. لا فاهمين صلاة قيام الليل غلط ..

    ايه بقى الكلام ده ؟؟ ازاى يعنى ؟؟

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    من 3 ايام بالظبط - مش عارف ايه حكايتي في الحلقة ديه عمّال احكي مواقف -

    بقول لصاحبي اللى كان بيقولى من سنتين عايزين نصلي تواريح : انت معايا انهارده ومش حتفلت مني

    قالى لا مش حينفع انهارده .. طيب انت بتصلي فين ؟؟

    قلتله ليه ؟؟ قالى :قول بس بتصلي في جامع ايه ؟؟

    قلتله : قلي ليه الأول ..

    قال : يمكن يكون نفس الجامع ، اصل فيه بنات صحابي رايحين يصلوا في جامع وقايلينلى اروح اصلي معاهم !!!!!!!!!!!

    فهمتوا بقه ازاى ان فيه ناس بيننا فاهمين قيام الليل غلط
    !!!

    انا فعلا اتثبتت .. مكنتش مستوعب اللى هو قالهولى

    كل اللى عرفت اقوله :

    طيب وهو الصلاة في المسجد ده بـ
    Minimum charge
    ولا ببلاش ؟!؟
    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    فيه ناس بقت فاكره ان التراويح في رمضان ديه .. خروجه

    يعنى انهارده احنا خارجين ر ايحين نصلى التراويح .. فيه شيخ هناك انما ايه .. صوته

    WOW
    تحفه .. سارة ومروة وحماده وكريم حيتبسطوا جدا

    يا جماعه مينفعش الكلام ده !!!

    واللى ياخد خطيبته لوحدهم ويروحوا يصلوا ويرجعوا تانى مع بعض

    مينفعش !!

    لازم نفهم يعنى ايه قيام ليل .. ايه حكمه وبنعمله ليه ؟

    قيام الليل سنّة .. يعنى مينفعش نعمل الحرام علشان نروح نعمل سنة .. مينفعش

    وقيام الليل بنعمله عبادة لله .. مش راحين خروجه .. مش رايحين نسمع صوت ونمشي علشان نتمزك نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي.. مش رايحين تأدية واجب علشان نقول لصحابنا صلينا تراويح انهارده عند الشيخ فلان اللى صوته ايه حكاية .. لازم تجربوه

    يا جماعه ديه مش حفلة عمرو !!

    ديه تراوييييييييييح .. قيام ليل

    مش رايحين علشان الدعاء بتاع الوتر !!

    والله انهارده واحد بقوله الشيخ فلان حيصلي التهجد في المكان الفلاني بعيد جدا

    احنا نروح نصلي تهجد في مسجد كذا بقه هناك الشيخ قراءته طيبة

    قالى بس دعاء الشيخ فلان مفيش زيه

    قلتله ياعم خليك في القراءة المهم القراءة

    قالى : لا بصراحه الدعاء عندي اهم من القراءة

    الله المستعان .. يعنى ناس بتروح علشان تسمع الدعاء وتعيط مع الدعاء .. اللى هو كلام الإمام .. كلام إنسان .. اللى كثير من العلماء كرهوا الإطاله فيه على الهيئة اللى بيفعلها كثير من الأئمة دلوقتى

    ومش مهم عنده القراءة اللى هي كلام الله

    اللى هي أصلا قيام الليل

    لازم نفهم يعنى ايه قيام الليل .. وبنعمله ليه

    ميبقاش فكرتنا عن قيام الليل ..

    زي الأعرابي

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    ______________________________

    كده خلصت الحلقة الحادية عشر يارب متكونوش زهقتوا
    ومعلش طولت عليكم أوى

    بس قلت أفضفض

    بس خلاص كده مش حطوّل تانى إن شاء الله

    وبكره إن شاء الله نلتقى في الحلقة الثانية عشر إن شاء الله

    وجزاكم الله خيرا
    __________________________________________


    ابسط ما تساهم به نشر الحلقات ولو بالايميل لأصدقائك

  3. #23
    عضو جديد
    رقم العضوية : 14937
    تاريخ التسجيل : May 2009
    المشاركات: 5
    التقييم: 10
    الجنـس : Woman

    افتراضي

    السلام عليكم ورحمة الله وبركاته

    جزاك الله خيرا علي القصه

  4. #24
    عضو جديد
    رقم العضوية : 34060
    تاريخ التسجيل : Mar 2010
    المشاركات: 4
    التقييم: 10
    الجنـس : Woman

    افتراضي

    بارك الله فيك اخى الكريم
    الحلقات غاية فى الروعة
    بس فين الباقى؟؟؟؟؟؟؟

صفحة 3 من 3 الأولىالأولى 123

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •