واحد – رجب ... اثنين – شعبان ... ثلاثة .........انطلـــــــــق
ياااااااااه ... الواحد كان منتظر رمضان بشكل
الحمد لله الذي بلغنا رمضان ... إحنا لسه في أول أسبوع في رمضان
لكن تصدقوا ... التعب بتاع كل سنة مش موجود خاااااالص
الواحد حاسس إنه مستمتع أوى برمضان ...
روحانيات عالية ... و صيام سهل و ميسر ... و طاعات كتيييييييييير ...
الحمد لله رب العالمين
بس أنا بقى على عكس أخويا حسين ... نايم طول الوقت عشان ميحسش بالتعب
هو بيلاقي وقت يقرا قرآن حتى ؟!! ... مش عارف أما أروح أصحيه و أكلمه شويه
عبد الرحمن : حسين ... اصحي يا بني ... إنت مش حاسس إننا بقينا بعد العصر خلاص
حسين طبعا مش هيقوم و لا بالطبل البلدي ... بس هحاول معاه برضو ... مينفعش أضيع عليه نعمة رمضان دي
عبد الرحمن : حسين ... يا بني قوم ... حرام عليك النوم دا كله ... هو إحنا في رمضان و لا في شهر تاني عادي يعني ؟
حسين : يوووووووه ... يا بني سيبني بقى ... أنا تعباااااااااان
عبد الرحمن : و إيه إللي تاعبك ... فهمني ؟!!
حسين : مش كفاية الحر إللي إحنا فيه دا ... رمضان السنة دي جاي في وقت حر بطريقة رهيبة
عبد الرحمن : ما هو إنت لو كنت بادئ صيام من رجب و بتحاول تدرب على رمضان مكنتش حسيت بالتعب دا
حسين : طب خلاص بقى ... سيبني أنام ...
عبد الرحمن : لأ مش سايبك طبعا ... يا بني عاوزين نستغل أيام الرحمة بكل الطرق ... يمكن ربنا يرحمنا في الأيام المباركة دي ...
حسين : طب و أنا أعمل إيه في الحر إللي أنا فيه دا ... بجد يا عبده عاوز أنام ... مش قادر أستحمل العطش دا كله ...
عبد الرحمن : ممممممم ... معلش ... بكره تتعود ... كان زمانك دلوقتي مستمتع زيي برمضان ...
حسين : خلاص يا سيدي ... ما تقعدش تأنبني كده ...
عبد الرحمن : أنا مقصدش يا حسين ... بس حاول حتى تقوم تقرأ ورد القرآن بتاعك ...
حسين : هو أنا أصلاً بدأت في قراءة القرآن !!!!
عبد الرحمن : إيه ؟!! ... يعني إنت لسه لحد دلوقتي ما بدأتش ورد قرآن ليك ؟!! ... أومال هتختم إزاي السنة دي في رمضان ... دا أنا كان أملي نعمل أكتر من ختمة قبل ما رمضان يخلص ...
حسين : يا عبده هو أنا من إمتى ليا ورد قرآن ...
عبد الرحمن : ما هو إنت لو سمعت كلامي كان زمانك معود نفسك على قراءة القرآن من قبل رمضان كمان ... يعني كان زمانك دلوقتي عامل ختمة على نهاية الأسبوع دا كمان ...
حسين : كنت عاوزني أعمل إيه يعني ...
عبد الرحمن : كان نفسي تعود نفسك على قراءة القرآن في رجب و شعبان ... أكيد كانت هتفرق معاك أوى دلوقتي ...
حسين : طب خلاص بقى هعمل إيه يعني ... إللي حصل حصل ...
عبد الرحمن : يا حسين ... رمضان بيجي مرة واحدة في السنة ... يا نلحقه يا منلحقوش ... و يا عالم بالحال هنعيش لرمضان إللي بعده و لا لأ ...
حسين : متقلقش يا عبده ... أنا بابقى نايم طول النهار ... و بعدين باصحى بالليل أشوف هعمل إيه
عبد الرحمن : طب يا ريتك تصحى النهادره و تيجي معايا القيام ...
حسين : لأ يا بني ... أنا قصدي أقعد أذاكر ... إنت ناسي إني في ثانوية عامة السنة دي ...
عبد الرحمن : لا حول و لا قوة إلا بالله ... يعني فاكر إنك في ثانوية عامة ... و بتقوم تذاكر و ناسي رمضان خالص كده ... رمضان مش في حسباتك خالص يا حسين ...
حسين : طب و العمل يا عبده ... فكرك أنا مش زعلان إن رمضان بيضيع مني دلوقتي ...
عبد الرحمن : طب ما دام إنت زعلان على إللي بيحصل مبتبدأش ليه لحد دلوقتي ...
حسين : خلاص يا عبده ... إللي بدأ بدأ من زماااااااااان
عبد الرحمن : أنا صحيح كان نفسي تبدأ من بدري بدل ما تفاجأ إن رمضان خلص و إنت معملتش حاجة فيه ... لكن مش معنى كده إنه ضاع ... حاول تبدأ من دلوقتي و ربنا يكرمك و تحصل أكبر قدر ممكن في رمضان ...
حسين : كان نفسي أبدأ زيك يا عبد الرحمن ... لكن خلاص ... أنا رمضان دا ضايع عليا ...
عبدالرحمن : طول ما إنت تقول كده يبقى عمرك ما هتبدأ ... لكن حاول تبدأ و ربنا ييسر لك الأمور بإذن الله ...
حسين : بإذن الله ...
زي ما إنتو شايفين ... هي دي مشكلة إللي مبيسخنش نفسه لرمضان كل سنة ...
يجي يقول هعمل كذااااااا ختمة ... ورمضان كله يخلص و هو لسه بيحاول يخلص في أول ختمة له ...
يقول هصوم بصدق و إخلاص ... لكن يلاقي نفسه رمضان جاي عليه بتعب و مجهود و إرهاق لإنه مش متعود على الصيام من قبل كده ...
يجي يقول طب القيام ... برضو يضيع عليه عشان أي حاجة تانية ممكن تشغله عنه ...
الحمد لله إني بدأت من أول رجب ...
حاسس إني مستمتع ...
حاسس إني عايش رمضان لأول مرة في حياتي بصدق ...
حاسس إني عاوز رمضان يفضل طوووووووووول السنة ... مش عاوزه يخلص خالص ...
واحد ... أثنين ... ثلاثة ... انطلق
